世界棍網球U20錦標賽 攝影後感｜Behind the Shots
開球係棍網寸土必爭嘅動作。因為邊個搶到波就有主動。所以我想影到一幅爭波時的表情。
攻門射球係棍網球賽事重要環節，所以我想影一幅正面攻門嘅相。
夜晚比賽，我鍾意利用背景燈光配合運動員嘅動作去構圖。不過都係一個字：等。
比賽過程中，雙方球員會用身法避開對方糾纏。呢張就係日本球員利用快速轉移，擺脫澳州球員攔截嘅瞬間。
現場觀眾打氣相係必備，呢個觀眾就交足戲啦。
賽後慶祝亦係必要元素，球員通常會拋起教練，所以就算比賽完結，都唔好即刻收埋相機呀。
另外我喜歡影背側光相，呢幅係日本運動員入波後嘅慶祝畫面。
大景係一輯相其中一個元素，今次我以日落去襯托旺角大球場。
後記
九年前 我迷上了運動攝影
運動員喺一場比賽嘅動作可能只做一次，你要喺瞬間捕捉得到，所以影運動係一種另類挑戰。而屈指一算，我已經第九年迷上哩種挑戰。
記得喺2015年，我參加咗大師叔(Conrad Yu)舉辦嘅攝影課程，當初只係打算見識另一種攝影，上完堂都無特別大感覺。其後喺同年參加珠海賽車攝影團，影相期間大師叔忽然走過嚟睇相：「㩒快門掣慢咗喎。」然後佢指導我調校距離、構圖及Pan鏡，並叫我等佢發號施令先㩒快門。影完之後我睇返啲相，嘩！點解啲相完全唔同晒！？從此我對運動攝影嘅愛泥足深陷、不能自拔。
Text、Photo：Ah Lam
Design：Yvonne
原文刊於《運動版圖》2024年10月號
